屋企個netvigator死足三日，
搞到我地好似晌個孤島度咁，
等到今朝先有人上黎整返好先爬到返上黎呢個世界~~~

星期六個日同laB食晏，
不停咳嘅佢個日又發燒，
睇完醫生未食藥都仲可以同我地玩得好興奮，
返到佢屋企，
佢阿媽開咗杯溝咗藥水嘅利賓納俾佢飲，
哇，個杯野，粉紫色架，係小朋友都懷疑啦，
結果小la B一路飲一路望，
要佢阿媽不停咁晌度講「係呀，係納納水黎架….你飲啦….」佢先肯飲。
飲到最後個底好杰，
佢阿媽堅持佢要飲埋佢，結果就出事……..
阿laB飲咗個啖相信係好杰好難飲嘅納納水，
突然反胃，
佢企晌度，成個噴泉咁嘔返晒d粉紫色嘅水出黎…….
=O=
佢飲一杯，嘔咗兩杯……
好驚呀~~
我第一次見識bb噴泉呀!!
簡直嘔咗成個許願池出黎…………
真係鄧佢辛苦。
就係咁，四個大人圍住一隻B轉，
佢阿爸要處理嘔吐物，
佢阿媽要抺地，
倫組組幫佢換褲，
我就幫佢抺腳趾…….=_=
湊細路，果然唔簡單……汗!

再唔簡單d，
就係laBd菌一d都唔簡單。
玩完BB之後第二日，
我開始流鼻水，倫組組開始咳，
跟住我地兩個同樣地發左兩日燒，
＝o = 我本身都算係唔容易發燒架，
但係la B隻菌竟然燒咗我兩日呀!
我好d，我keep住燒38C，倫組組就燒到39C……
又熱又凍，唔come被又覺得凍，
come咗格胳底同背脊等地方又標汗，
不停咁come被撇被，
哇，辛苦到呢….
唉，而家輪到我咳到甩肺呀，
仲係好攰成日眼瞓……
La La，我地知錯啦，
第時你個仔病，我地唔會再嘈住話要上黎探病架啦……..